بدأت إجازتي (ما يخصه بالموضوع :em05: بس من الوناسة قلتها)

الموضوع..

بينما كنت أقلب في أوراق الذكريات الجامعية.. وأتأمل في صوري القديمة (طبعا الكاميرا تهريب !!) رجعت بي الذاكرة إلى الوراء إلى أيام السكن الجامعي (كنا انسميه السجن الجامعي:em19: ) ..كم أحن إلى تلك الأيام الجميلة (جذابة لليوم ما أدانيه:em05: ) وإلى المواقف الطريفة التي مررت بها مع صديقاتي ..

رائعة تلك السويعات ..ضحكنا ومزحنا.. حزنا وسئمنا.. لهونا ومرحنا.. (شو بعد ) المهم هالسوالف!!

وتذكرت تلك المشرفة المتسلطة التي تسمى (مدام) وتحايلنا لها عندما نخالف القانون (اللي يسمع ايقول جريمة مخالفة قانون كانت متجسدة في الدخون)..

وأجمل الأماكن التي كنا نرتادها: المطعم (إذا سرنا) و جمعية السكن (غصبن عنا ماشي أماكن غيرهم)..

أخيرا وصلت للجمعية :em20: !! الحمد الله بيبدأ الموضوع..

الجمعية: مكان صغير تستطيع ان أتقول انه (بقالة) أو سوبر ماركت مصغر ..

في هذي الجمعية تحدث أمور عجيبة غريبة!!

في بداية ذهابي للجامعة كنت وايد أروّح الدكان (قصدي الجمعية) مع اربيعاتي وانحط الأغراض في السلة ونوقف في طابور من بداية الجمعية لنهايتها!! وحتي يوصل دوري للمحاسبة يبالي حوالي نص ساعة في الأيام اللي مافيها زحمة (والسلة يادوب داخلها بيبسي وكندر).. ونحن ما عندنا شغله طول الوقت سوالف وتعليقات وضحك إلى أن نعتق .. ( لغاية هنيه الأمر طبيعي)

أول مرة ما لاحظت شي غريب .. ثاني مرة بعد ما انتبهت .. ثالث مرة لا أكيد في شي !! كنت كل ما أرد من الجمعية ألاقي في الكيس (لبان!! شبس ما أحبه!! أحيانا أكياس المحارم!! وبسكوت بو نص!! :em19: )
وأنا على طول أسير أهزب اربيعتي (أقولها عن هالمقالب السخيفة!!) وهي تطالعني وهب فاهمة شي!!

ساعتها قررت اراقب السلة وأشوف منو هذا اللي كل ما أسير الجمعية ايحط لي لبان!!

وكانت الصدمة!! طلعت الحبيبة اللي تحاسب هي اتحط لي هالخرابيط!! لا وبدون ما تشاور..:em14:

جان أسألها شقاعدة اتسوين؟؟ قالت لي حسابج طلع (45 ونص) وبكمل النص بلبان أدفعي 46!! :em19:

(عجبتني الأمانة بصراحة) سألتها لها ليش مافيه (جينج)؟؟ قالت لأ من وين انيب نص!! منطق مقبول!!

وبعد فترة لا حظنا الموضوع زاد عن حده يعني يطلع لحساب 44 اتقول (مافي جينج) اشتري بدرهم (45 فيه جينج ).. وبعدين يطلع لحساب 45 اتقول اشتري بـ خمس عسب أرد لج 50 من 100 (ما في جينج)

اربيعتي حالها من حال كل البنات (أتقولها اشتري بـ 5 اتقول انزين) .. عاد (أنا) أونه بصير شجاعة وما بستحي قلت لها ما أبا شي ردي الباقي (قامت ترست لي الكيس لبان:em19: ) ..مافي جينج!! ..

هذيك الساعة عرفت أنه فيه عملة جديدة انضافت إلى عملات الإمارات (ألا وهي اللبان) فقررت الآتي..

أولا: أحط لي حصالة خاصة فيها لبان!!

ثانيا: كل ما أسير الجمعية أشيل ويايه لبان (أونه جينج) ..

وهاك اليوم حركات (خذت ويايه لبان ) ودخلت الجمعية واشتريت وكالعادة طلع لي الحساب (شي ونص) والحبيبة يت بتحط لي لبان قلت لها لا ما يحتاي (فيه جينج!! ).. وطلعت اللبان اللي عندي وعطيتها!! (اربيعتي شردت:em05: ) قالت لي لا ممنوع:em08: !! قلت لها نفس الشي (يت المدام وقالت لا أونه شو يضمن لي انه اللبان من عندنا ) لا ذكية اتعرف اترد (ما أدري من وين بنشتري إذا ما كان من عندهم:em20: !!)

اللي يقهر اني مرة دخلت الجمعية من الصبح !! وشفت المسؤولة تجرد وطلعت من داخل أكثر من أربع أكياس (حصيلة اليوم السابق) خرده جان أقولها عيل (فيه جينج!!) قالت لي لا نحن ما نقدر انبطل هالأكياس لأنه خلاص مقسمينها لمئات وصارت جاهزة للجرد!!:em18:

واللي يقهر زيادة ان العدوى انتقلت لخارج نطاق السكن.. صارت هالسوالف اتصير في البقالة والسوبر ماركت (لصغير حتى انكون واقعيين) .. والجمعيات الفرعية في بعض المناطق!!



خوفي باجر أسير جمعية بوظبي وألاقيهم يحطولي لبان ويقولوا لي (ما فيه جينج)!!!



أنا بصراحة أطالب وزارة الاقتصاد (بما أن الوزير حرمة يعني واسطة بتسمع لي:em26: ) أنهم يعتمدون اللبان كعملة رسمية في محلات البقالة!! وتكون بديل للجينج و يفتحون بنوك لصرف اللبان!!



دمتم بود..

الأرن

ملاحظة: (ظاهرة اللبان بدل الجينج) بدأ بإيحاء من أستاذتي روحي مطمئنة ثم صيغ الموضوع بقلم الأرن..

انزين ما خبرتينا ..
شو نوع الماركة:em18:
ترا اهم الشي ماركة اللبان
انزين ماعندهم ايس كريم بونص :em18:
ولا بعد خلو ايس كريم 75 فلس؟ عشان دفعين لهم درهم
ومايكون عندهم جنيج

الارن الموضوع حلو ووايد مهم الصراحة
لازم نحط لهم حد من هالظاهرة
موضوع (( حرامي عيني عينك ))

وحركاتهم معروفة كالعادة
وخاصة في الجمعيات
يعني شي بخمس دراهم
بتشوفين حاطين 5دراهم و15 فلس (( اونه حليلهم شو يعني الا 15فلس )):em04:
اوكي خمس بندفع لهم
بس من وين انيب 15 فلس :em19:
انا احيد عندنا 25 فلس و50فلس
ما عندنا 15 فلس:em12:
يعني ادفعي لهم 5دراهم و25 فلس واذا ماعندج 50 فلس
خلونا نحسب
اذا دفعتي 25فلس يعني 15 فلس في جيبهم
واذا دفعتي 50 فلس يعني45 فلس في جيبهم
(( على اساس ما عندهم جينج ))
ولا بيعطونج للبان بينتهي تاريخ صلاحيته بعد شهر يمكن او عقب اسبوعين بعد عادي يسونها:em26:
(( ماشاء الله علي قمت احسب مع اني اخس مادة عندي رياضيات بس كنت شاطرة ))

تخيلي عاااااااد في سنه كم يحصلون من هالفلوس فلس على فلس طلعوا ألالف في سنه وحدة
ياسلام:em31:

وانا بعد اطالب الوزارة الاقتصادية
انهم يسون لنا عملات جديدة كالفلس و2فلس و3فلس لغاية 99 فلس:em12:



عشان يكون في عندهم جينج :em04:

شي غريب ((( العملة اليديدة )))

عيبتيني يوم :


والحبيبة يت بتحط لي لبان قلت لها لا ما يحتاي (فيه جينج!! ).. وطلعت اللبان اللي عندي وعطيتها!!


مشكورة يالغاليه على موضوعج الشيق


لكي مني أرق تحيه ....

الأرن:

بنت فلان تسأل شو ماركت اللبان بتصوره وبتحطه لج في الموضوع !!

من يومين في الجنسية والهجرة قاعد اصور بعض الاوراق وقالي الحساب 6 دراهم عطيته 10 قالي معاك درهم !!
قلت له خل الباقي عندك لكن مب اتقولي عقب 6 شهور مافي لي باقي !!

مع التحية والتقدير

الارن

مرة كنت مع اربيعي نتعشى باحد الفنادق

وبعد دفع الحساب اكتشف اربيعي انه باقلنا 25 فلس

وكلم مدير المطعم وقاله باقلي 25 فلس سار المدير وعطاه درهم

اربيعي عصب وقاله انته بتبخشش علينا

انا ابا حقي وبس

طبعا الريال ما كان عنده جينج

واربيعي كبر السالفه وقاله المصرف المركزي مسوي عملة فئة 25 فلس ولازم تكون موجوده عندكم وانتوا فندق 5 نجوم

وقاله لو كنت انجليزي جان رجعت فلوسي كامله بس انتوا تستعبطون العرب

وصدق نفخلنا راسنا

الارن المشكله موجوده ومنتشره حاليا بمحطات البترول

الحل بسيط

محد يسكت عن حقه ولو كان فلس واحد ومع الايام بيتعلمون انهم يوفرون الجينج

اذكر قريت قصه انه انجليزيه عيوز اكتشفت عمليه نصب كبيرة ببريطانيا

كانت العيوز بخيله واكتشفت انه رصيدها نقص ا بني ( تقريبا 5 فلس)

وراجعت البنك وبعدين اكتشفوا انه احد الموظفين يسرق ا بني من كل حساب وجمع ملايين

تحيااااااااااتي ولا تخلون الناس تسوي ملايين من فلوسكم وغصبا عنكم


ملاحظه

موضوع حلو وسرد رائع تسلم ايدج اختي

هيه ذكرتيني بالعوق و قلبتي المواجع .........:em12: :em12: :em12: :em12:



ياربي على ذيك الايام :em11:
بس والله الحياه بالجامعه حلوه و ما في احلى من ذكرياتها بحلوها ومرها

حتى الحركات الي تسويها الجمعيه عشان يتحايلوا علينا :em04:

اعتقد لو ينصرف لنا كوبونات بدل اللبان0
اخر السنه بننصدم من المبالغ اللي بنجمعها

عرض متميز لموضع مهم :em37:

* الأرن *


اختي الغالية هالشي منتشر الحين في كل الاماكن << الا دكانا:em05:

و حتى لما انروح الجمعية لاحظت ان المحاسب يحط كاكاو فقلت لاختي

ليش يحط الكاكاو و نحن هب طالبين (يحليلي ع نياتي والله )

فقالت لي اختي ما عندهم خردة (اللي هو الجينج)

فقلت مدام كاكاو عاادي :em37: ..


و اذكر مرة كنت سايرة محاضرة .. فيقول المحاضر قصة صارت له مع وحدة من المطاعم

هو كان طالب الاكل توصيلة للبيت .. و طلع الحساب 98

فعطى لولده 100 و قاله وده للريال فلما رجع .. قاله وين الباقي (اللي هم درهمين)

قاله ما عطاني .. و في اليوم الثاني سار للمطعم و قالهم انتوا سرقتوا

و الجماعة مستغربين .. شو بلاه الريال يالس يتبلا علينا :em16:

فقال لهم السالفة الا هم يضحكون و قالوله بدال الدرهمين خمس ..

فقال لهم السالفة مب سالفة درهمين و خمس المفروض اتردون الحقوق لاصحابها

و لو واحد ثاني جان بيقول الا هن درهمين .. ما يرزى عليّ

و مثل ما قال اخوي az المفروض ما نسكت حتى لو كان فلس واحد


و تسلمين الختي ع الموضوع الحلو

نتريا الزيد

الأرن
تسلمين عالموضوع الشيق
وهذا الموقف مر علي واجتزته
وبغيت انصحج نصيحه : انج تروحين للدكان وعندج جينج(خرده) ربوع ونصوص ودراهم وتعطين البقال بالتيم والتمام وتفتكين من صدعة الراس
مع تحياتي
رسول الغرام

حلوة هاي عيبتني ((أنا بصراحة أطالب وزارة الاقتصاد (بما أن الوزير حرمة يعني واسطة بتسمع لي ) أنهم يعتمدون اللبان كعملة رسمية في محلات البقالة!! وتكون بديل للجينج و يفتحون بنوك لصرف اللبان!!))
بصراحة ما تنلام المدام يوم بتقولج((لا نحن ما نقدر انبطل هالأكياس لأنه خلاص مقسمينها لمئات وصارت جاهزة للجرد!! )) حليلها مافيها ترد تعد مرة ثانية.
هاهاهاهاهاهاهاهاها.......إلخ


أخوج
سر الظلام

الارن

+ + +


تسلمين اختي على الطرح الرائع


و المشكله لما يكون فيه (جينج ) خرده .. لكن ما يبون يعطون اما علشان يربحون اكثر .. او علشان بعض البيااعه ياخذون الباقي ..

لكن متابعة الامور كل ما تطلع لنا ظاهره غريبه شي مهم ...

ع الاقل نكون على درايه بما حولنا


و لج مسك التحااياا

فداعة الله

مشكووووووووووووووووووووووووووووووووووووووووووووور

ههههههه

حلوة هاي بعد ما في جينج..

لا نحن في مدرستنا متطورين اذا ما عندهم جينج يعطونا اوراق حق المرة الياية نتشرى فيهم...احسن والله ناخذ حقوقنا..

تسلمين عالموضوع الرائع..

غناتي الأرن

مافي جينج تراها مال أول
أيام جامعتكم <<< جنكم من أيام الديناصورات :em03:
هذاك زمان السيلانيات والهنديات وهز الروس لووووووووووول




هاليومين بعدهم على على عملة اللبان بس اللهجة تغيرت
اتييج الفليبينية وبكل ذرابة ... وتقوووووول

سوري مدام .... No جـــــــــينج
do you mind taking some ....لبــــــــــان؟!!

وقبل لا تردين عليها أو اتدورين على الجينج ... حطت لج chewing gum

والغريب .. ان الوافدين أو الأجانب ما يحتاجون لها الفئة من العملات








الأرن .. أنا بييب حصالتي وبحطها عندج وبفرغها كل شهر
بس حطي جينج من نوع sugar free:em26:

مشكورة اختي على الموضوع

هههههههههههههههههههههههههههههههه|83|
عجيب الصراحه والله عيبتيني (ما في جينج) انا سمعت قبل عن السالفة اللي عندكم من اختي الاكبر مني واصريت انها تقرى الموضوع وياي واسميهااااااااااا ...... ماتت من الضحك
لان فعلا هالشي اللي يحصل معاها الحين بس الاختلاف بينج وبينها انها تعاصر هالمواقف الحين بهيئه متطورة وفي (دكان) جمعيه كبيرة ويديده رقوهم |40| خخخخخخخ ع قولتها (اخيرا)
والمشكله انه في كل مكان مو بس الجمعيه (الدكان)|40| حتى المكتبة واماكن تصوير الاوراق والكوفي الخ ........
الصراحه غمضتوني وانا ارأف بحالكم وبحاول اوصل شكواكم لوزارة لاقتصاد ههههههه بس حاولوا لين هذيك الحزه تحتفظون ب(جينج)

وتسلمين اختي ع االموضوع والاسلوب الحلوووو واحلى شي الجينج مالج

تسلمين حبوبه على الطرح بس مامر علي هالشي
ما اذكر والله بس يمكن مر علي وانا مانتبهت انا اشوف
بالمراكز والجمعيات ما ادري 50 فلس ولا غيره بس ما اسويله سالفه
يعني اسميني فاشلة في كل شي
عالعموم يسلموووووووووووووووووووووووو

ThanXxXxxXx 4 the subject (y)

ياي ودي ازور جمعيتكم واشوف اللبان هههههههههههههههههه ذكريات فلة:em05: :em03:

مشكووووووووووووووره

هههههههههههههههه

حلوة منج الصرااحه موضوووع جميل وهووو الواقع والي يصير

يسلمووو ع العرض الرااائع لهالموضووع

هههههههههههه والله حاله ..

احنا ترى بعد نفس الشي .. ال50 فلس يعطونا بدالها علج << لبان ..

عالعمووم :: يسلموو عالطرح ..





كويتيه كوول..

هههههههههههههههههههههههههههههههههههههههههههه

والله قاعد اقرا و اضحك

يعطيج العافيه اختي الارن موضوعج مسلي الصراحه

بس تدرين ولا مره صارت لي هالشغله او يمكن انا ما احط بالي !!

تسلمين اختي ع الموضوع

ههههههههههههههههههههه والله الاموووور عندي عااادي كل يوووم يصير لي ههههههههه
تسلميييين اختي خليتي اموووت من الضحك

:em37: :em37:
مشكوووووووووووووووووووور

يعطيج الف عاااااااافية

هي والله صدقج
نحن في الجامعه الجينج مالنا صار لبان
لا والمصيبه اللبان مب حلو
شكرا الغاليه على الموضوع الفنتك

هههههههههههههههههه

شي حلوة واقراح ااحلى


بصراحة انا من رايج
والموضوع روعة واسلوبج اروع
مشكورة اختي
ونتريا المزيد

فمان الله

مشكووووووووووووووووووووره اختي على الطرح الحلوو

خخخخخخخخخخخخخ صرااااااااااحه اول مره اعرف بهاااي السااالفه وهااي العمله العجيبه شو يسكتووونا بلبااااااااان

لا امي لا مابنسكت ولا شي لو حتى على فلس واحد نبااه نباا هذا الفلس يسوي وايد اشياء خخخخخخخخخخ<<<..........شوها زطيه انتي خخخخخخخخخخخ

بس الحق حق يسلموووووووووووو

خويتكم همس المعاني

(والسلة يادوب داخلها بيبسي وكندر).. <<<<<<< أحلى شـــــــي ..


بس صدق طلعتي قووية ..

عيل ما تبين تشترين تستقوين عليها .. تستاهل والله ..

والله مواضيعج مشوووقة يوم أقراها ما أمل .. مشكوووووورة الارن .. تسلم ايدج ..

وما بنسى روحي مطمئنة لأنها اوحتلج الفكرة .. يسلموووووو ..

موضوع جميل بس نحنا بنعاني من زلادة الفراطه مو نقصها بنضنا نحاول التخلص منها وإزا حدا أعطانا بنحكيلوا مسامح بس مشان الله خلصنا
ههههههههههههه
بس شكلو عندكم الموضوع كبير كتير
الله يوفقكم

هههههههههه شكلي عرفت جامعج من هاي السالفه :::

وستوت معاي هاي الحركه بعد ::::
وان شاء الله الوزيره تـسمع منج عاد هع

موضوع ازقرت نفس راعيته
:p

اسولف مب تصدقين عمرج
ههه


الحل انج تسيرين البنك وتقوليلهم ابا تحولولي اميه لخردت لانه وانتين ونصوص
وبس كل ما تسيرين انت عطيهم الخرده بدال لا يعطونج
^_^
يعني يوم بيستوي
24 ونص عطيهم نص عسب يردون ريال وجي ها

انا عن نفسي مافي مره شتريت فيها و باقالي جينج اكقل عن 5 و ردولي اياه إلى بالصدفه ... اما مطعم زهره لبنان ما يكفيهم الي يربحونه بعد ياخذون الباقي و ما يعطونج لا لبنا و لا الخرده الي تبقا ... على العموم اني اي مكان بتروحينه خلي وياج خرده للضروره يعني ^__^







×?°اختج بتي بوب×?°

موضوع فلة أختي الأرن

وياليتهم ياخذون الفكة -إلي هي الجينج - عاد لما اعطيهم الـ5 فلوس و الـ10 فلوس تتلخبط ألوان وييهم ما ادري احمر على ازرق على خضر... ما يرضون ياخذونها هذا شو ماما؟! هات روبية :sm175:

تسلميين

ثـــــآآنكس اخووي الارن على الموضووع الحلوووو ..

هههه والله كششششششخه الموضوع وصدقتي بكل كلمه

المشكله مب فالنصوص والربوع المشكله انهم يستغلون العرب ويستعبطونهم
وهذا اللي يقهر ..

انا اسكت عنهم في الجمعيه ولا اي مكان ثاني بس اختيه تحرج علي تقولي محد مفيدهم الا انت ........

والله مره قالت لي سالفة ريلها وذبحتني من الضحك..

قالت انه عصب ع البنك وانهم كل مره ينقصون منه كم من فلس .. (لمدة سنه كامله )
المهم راح لهم وطالبهم بكل فلس .. فلس ينطح فلس ...
وطلعت له 350 درهم .. والله حاله .. بس زين يسوي فيهم